Friday, 30 January 2015

எழுநா வெளியீடுகள் - யுகபுராணம் பற்றிய சிறுகுறிப்பு

எழுநா வெளியீடாக வந்துள்ள 10 நூல்களின் அறிமுக நிகழ்வு கடந்த சனிக்கிழமை லண்டன் ஈஸ்ட் ஹாமில் நடந்தது. அறிமுக உரைகளில் கேட்டவற்றை வைத்துக்கொண்டு பத்து நூல்களும் முக்கியமானவை என்றே ஊகிக்க முடிகிறது. ஆக்கபூர்வமானதொரு செயற்பாடு. அறிமுகப்படுத்தப்பட்ட நூல்களில் சில விற்பனைக்கு இருக்கவில்லை. நான் கீழ்க்கண்ட நூல்களை வாங்கி வந்தேன்:
நிலாந்தனின் 'யுகபுராணம்'
தீபச்செல்வனின் 'கிளிநொச்சி - போர் தின்ற நகரம்'
முனைவர் ஜெ.அரங்கராஜ் தொகுத்திருக்கும் ' சுவாமி ஞானப்பிரகாசரின் பண்டைத் தமிழர்' 
தி.த.சரவணமுத்துப்பிள்ளை இயற்றிய 'தமிழ்ப்பாஷை என்னும் தமிழியல் ஆய்வும் தத்தைவிடு தூது முதலான ஏனைய பிரபந்தங்களும்'
பரம்சோதி தங்கேஸ் எழுதிய 'யாழ்ப்பாணத் தமிழர் கலாசாரத்தில் சாதியமும் இனத்துவமும்'



இவற்றில் 'யுகபுராண'த்தை வரும் வழியில் ஒருமுறை முழுவதுமாக வாசித்து விட்டேன். பூர்விகச் சங்கேதங்களின் வழி சொல்லப்பட்டிருக்கும் இற்றைத் துயரம் - நந்திக்கடல் அவலத்தின் பின்பாக எழுதப்பட்ட கவிதைச் சாட்சியம் என்றும் சொல்லலாம். இந்த 40 பக்க நூலில் 27 பக்கங்களை மாத்திரமே கவிதைகள் எடுத்துக் கொண்டுள்ளன. கவிதைகளில் விவரிக்கப்படும் வாதையின் கனம் போதாதென்று புத்தகத்தின் பக்கங்களிலும் கனம் ஏற்றுவான் ஏன் என்று பதிப்பாளர்கள் நினைத்திருக்கக் கூடுமோ என்று தோன்றியது. சான்றாகச் சில வரிகள்:
'பற்றியெரிந்தது பனங்கூடல்
பாடாதே பறந்தது
கொட்டைப்பாக்குக் குருவி.
காடு புகைந்தது.
காட்டாறு
பாலியம்மன் காலடியிற்
பழிகிடந்தது
தொட்டாச்சிணுங்கி முட்களிற்பட்டுக்
குற்றுயிரானது வன்னியன் கனவு..'
'அது ஒரு யுகமுடிவு
பருவம் தப்பிப் பெய்தது மழை
முறைதவறிப் புணர்ந்தனர் மாந்தர்'
'மரணம்
பதுங்குகுழியின் படிக்கட்டில்
ஒரு கடன்காரனைப் போல காத்திருந்தது'
'வழி நெடுக
தலைப்பிள்ளைகளின்
ரத்தம்
காற்றைக் கிழித்தது
பீரங்கி
கடலைக் குடித்தது
நரகத்தீ
வானில்
மரணப் பட்டமென
அசையும்
வேவு விமானம்'
தீபச்செல்வனின் 'கிளிநொச்சி'யை வாசிக்கத் தொடங்கிப் பாதி வழி கடந்திருக்கிறேன். நெஞ்சில் தொற்றும் பிழிதல் உணர்வு அகலாமல் படிந்துவிடக் கூடுமோ என்ற அச்சத்துடன்.
(ஜனவரி 26, 2015 அன்று ஃபேஸ்புக்கில் பதிந்தது)